සටහන: මෙම පිටුවේ පරමාර්ථය වන්නේ අපගේ වෙනත් භාෂා කොටසෙහි අප සපයන සමාන පිටුවල ඉංග්රීසි භාෂා අනුවාදයක් ප්රජා සහ උපදේශක සංවිධානවලට ලබා දීමයි. කුලියට ගැනීම පිළිබඳ අපගේ සම්පූර්ණ තොරතුරු සඳහා, අපගේ කුලියට ගැනීමේ කොටස බලන්න.
ඔබේ කුලී අයිතිවාසිකම් සහ වගකීම්
දේපළක් කුලියට ගැනීමේදී ඔබට අයිතිවාසිකම් සහ වගකීම් කොටසක් ඇත. මෙම පිටුව ඔබට කුලියට ගැනීම පිළිබඳ හැඳින්වීමක් ලබා දෙන අතර ඔබට අවශ්ය නම් වැඩි විස්තර සොයා ගැනීමට උපකාරී වේ.
වික්ටෝරියාව 2021 දී කුලී නීතිවල සැලකිය යුතු වෙනස්කම් සිදු කළේය. නව නීති ගැන කියවන්න.
මෙම පිටුවෙහි අඩංගු දෑ:
දේපළ ඔබට සුදුසු දැයි තීරණය කිරීම
ජීවත් වීම සඳහා කෙනෙකුගේ දේපළක් කුලියට ගැනීමට ඔබ ඔවුන් හා එකඟ වන විට, ඔබ නේවාසික කුලී ගිවිසුමකට එළඹේ. මෙය නීතිමය ලියවිල්ලක් වන අතර, ගිවිසුම අවසන් කිරීමට කාලය ගතවනු ඇත, එබැවින් දේපළ ඔබට සුදුසු යැයි ඔබ විශ්වාස කළ යුතුය.
ඔබ කුලී ගිවිසුමකට එළඹීමට පෙර, කුලී සැපයුම්කරුවෙකු (ඉඩම් හිමියා) ඔබට අනිවාර්යෙන් පැවසිය යුතු නිශ්චිත තොරතුරු තිබේ. මේවා අනිවාර්ය අනාවරණය කිරීම් ලෙස හැඳින්වේ. ඊට පහත දෑ ඇතුළත් වේ:
- දේපළ විකිණීම සඳහා ඉඩම් හිමියා නියෝජිතයෙකු සමඟ සම්බන්ධ වී ඇත්නම් හෝ දේප විකිණීමේ කොන්ත්‍රාත්තුවක් සකස් කර තිබේ නම්, ඒ බව.
- ඔවුන් දේපළෙහි හිමිකරු නම් හෝ එසේ නොවේ නම් ඔවුන්ට දේපළ කුලියට දීමට අයිතියක් ඇති බව.
- කුලී දේපළ හෝ පොදු දේප පසුගිය වසර 5 තුළ මිනීමැරුමක් සිදු වූ ස්ථානයක් නම්, ඒ බව.
- කුලී දේපලෙහි ඇස්බැස්ටෝස් තිබේ නම්, ඒ බව.
අනිවාර්ය අනාවරණ අවශ්‍යතා පිළිබඳ වැඩි විස්තර සඳහා බලන්න ගිවිසුමක් අත්සන් කිරීමේදී ඔබේ අයිතිවාසිකම් දැන ගැනීම.
කුලී සපයන්නන් විසින් වෙනස් කොට සලකනු ලැබීම
වික්ටෝරියා හි, යම් යම් පෞද්ගලික ගුණාංග පදනම් කොටගෙන යමෙකුට වෙනස් කොට සැලකීම නීති විරෝධී ය. මෙයින් අදහස් කරන්නේ කුලී සපයන්නන්ට සහ දේපළ වෙළඳාම් නියෝජිතයින්ට නීතියෙන් ආරක්ෂා කර ඇති පුද්ගලික ගුණාංග මත පදනම්ව ඔබේ කුලී යදුම්පත ප්‍රතික්ෂේප කිරීමට හෝ කුලී කාලය තුළ ඔබට වෙනස් කොට සැලකීමට නොහැකි බවයි.
ඔබ කුලී දේපළක් සඳහා ඉල්ලුම් කරන විට, කුලී දේපළක් අත්පත් කර ගැනීමේදී හෝ කුලී දේපළක් අතහැර යන විට මෙම පුද්ගලික ගුණාංග නිසා ඉඩම් හිමියෙකු හෝ ඔවුන්ගේ නියෝජිතයා ඔබට නොමනා ලෙස සැලකීම හෝ ඔබට වෙනස් ලෙස සැලකීම නීතියට පටහැනි වේ.
කුලී අයදුම්පත්‍රයේ කොටසක් ලෙස ඔබ කුලී දේපළක් සඳහා අයදුම් කරන සෑම අවස්ථාවකම කුලී සැපයුම්කරුවන් විසින් ඔබට වෙනස්කම් කිරීම පිළිබඳ තොරතුරු ලබා දිය යුතුය.
කුලියට දීමේදී/ගැනීමේදී වෙනස් කොට සැලකීම පිළිබඳ වැඩි විස්තර සඳහා, බලන්න කුලියට ගැනීමේදී නීති විරෝධී ලෙස වෙනස් කොට සැලකීම.
කුලී සැපයුම්කරුවෙකුට ඔබෙන් විමසිය නොහැකි ප්‍රශ්න
ඔබ කුලී දේපළක් සඳහා ඉල්ලුම් කරන්නේ නම්, කුලී සැපයුම්කරුවෙකුට පහත දෑ ඔබෙන් විමසිය නොහැක:
- ඔබ මීට පෙර කුලී සැපයුම්කරුවෙකු (හෝ වෙනත් නිවාස සැපයුම්කරුවෙකු) සමඟ ආරවුලක සිටියාද යන්න
- ඔබේ බැඳුම්කරයෙන් කවදා හෝ ඔබ මුදල් ලබාගෙන තිබේද යන්න
- කුලී සැපයුම්කරුවෙකුට ඔබගේ සියලු දෛනික ගනුදෙනු අඩංගු ණය හෝ බැංකු ප්‍රකාශයක් ඉල්ලා සිටිය හැකි නමුත්, ඔබේ පෞද්ගලිකත්වය ආරක්ෂා කිරීම සඳහා ඔබට සමහර ගනුදෙනු ඉවත් කළ හැකිය.
- මෙම තොරතුරු අවශ්ය වන හේතුව ලිඛිතව සපයන්නේ නැත්නම්, සමාන අවස්ථා පනත 2010 යටතේ ආරක්ෂිත ගුණාංගයක් පිළිබඳ කවර හෝ තොරතුරක්.
සමහර විට කුලී සපයන්නන් මෙම තොරතුරු වෙනත් ප්‍රභවයන්ගෙන් ලබා ගනී. නමුත් ඔබ දේප සඳහා ඉල්ලුම් කරන විට ඔවුන්ට ඔබෙන් මෙම තොරතුරු ඉල්ලා සිටිය නොහැක.
කුලී ගිවිසුමක් ආරම්භ කිරීම
ජීවත් වීම සදහා කෙනෙකුගේ දේපළ කුලියට ගැනීමට ඔබ ඔවුන් හා එකඟ වන විට, ඔබ නේවාසික කුලී ගිවිසුමකට එළඹේ (මෙය සමහර විට බදු හෝ කුලී ගිවිසුමක් ලෙස හැඳින්වේ).
ගිවිසුම ලිඛිතව හෝ වාචිකව කළ හැකි නමුත් ගිවිසුම ලිඛිතව තබා ගැනීම වඩා වැදගත්ය.
කුලී ගිවිසුම් යනු ඔබ සහ කුලී සැපයුම්කරු අතර ගිවිසුමක් වේ. ඒවායේ ඇතුළත් වන්නේ:
ලිඛිත කුලී ගිවිසුමකට එළඹීමේදී ඔබ ‘නියමිත පෝරමය’ භාවිතා කළ යුතුය. වික්ටෝරියානු කුලී නීතිය මගින් නියමිත පෝරමයක් අර්ථ දක්වා ඇත. අපේ නිල ආකෘති පත්‍රය (පෝරමය) භාවිතා කිරීමට අපි නිර්දේශ කරමු.
අවුරුදු පහක් හෝ ඊට අඩු ස්ථාවර කාලීන ගිවිසුම් සඳහා, අපගේ නිල පෝරමය භාවිතා කිරීම අපි නිර්දේශ කරමු
ආකෘති පත්‍රය 1.
අවුරුදු පහක් හෝ ඊට අඩු ස්ථාවර කාලීන ගිවිසුම් සඳහා, අපගේ නිල පෝරමය භාවිතා කිරීම අපි නිර්දේශ කරමු
ආකෘති පත්‍රය 2.
කුලී නිවැසියන්ට හෝ කුලී සැපයුම්කරුට නේවාසික කුලී පනතට අනුකූල වන තාක් කල් කුලී ගිවිසුමට කොන්දේසි හෝ රීති එකතු කළ හැකිය.
නිදසුනක් වශයෙන්, කුලී සැපයුම්කරුවෙකුට දේපළ තුළ දුම් පානය නොකිරීම පිළිබඳ රීතියක් ඇතුළත් කළ හැකිය. නැතහොත්, සෑම වසර දෙකකට වරක් සියලුම ගෑස් උපකරණ සේවා සැපයිය යුතු යැයි රීතියක් ඇතුළත් කිරීමට කුලී නිවැසියෙකුට ඉල්ලා සිටිය හැකිය.
ඔබ ගිවිසුමක් අත්සන් කළ යුත්තේ කුලී ගිවිසුමක ඇති සියලුම නීතිරීති මෙන්ම කුලී නිවැසියෙකු ලෙස ඔබේ අයිතිවාසිකම් සහ වගකීම් තේරුම් ගෙන ඔබ ඒවාට එකඟ වන්නේ නම් පමණි.
ඔබට නොතේරෙන දෙයක් තිබේ නම්, එය පැහැදිලි කිරීම සඳහා අපව අමතන්න.
පදිංචි වීමට පෙර
ඔබ කුලී නිවසට පදිංචියට යාමට පෙර, ඔබේ කුලී සැපයුම්කරු හෝ නියෝජිතයා ඔබට පහත දෑ ලබා දිය යුතුය:
- කුලී ගිවිසුමෙහි පිටපතක්
- ගිවිසුම අත්සන් කළ සෑම කුලී නිවැසියෙකුටම යතුරු කට්ටලයක්
- කොන්දේසි වාර්තාවක් (ඔබට බැඳුම්කරයක් ගෙවීමට අවශ්ය නම්)
- ඔබට හදිසි අලුත්වැඩියාවක් අවශ්ය නම් අවශ්ය වන සම්බන්ධතා තොරතුරු.
ඔබ භාවිතා කිරීමට අදහස් කරන ජලය, විදුලිය, ගෑස් සහ දුරකථන සමාගම්වලට ඔබ ඇමතිය යුතු අතර එම සේවාවන් ඔබ පදිංචි වන කාලය වන විට සම්බන්ධ කර ගත යුතුය. ඔබේ ගිවිසුමට ඇතුළත් නොවන්නේ නම් මෙම සේවාවන් සංවිධානය කිරීම සහ බිල්පත් ගෙවීම ඔබේ වගකීමකි.
වැඩි විස්තර සඳහා, උපයෝගිතා සහ සේවාවන් ස්ථාපනය කර ගැනීම යන්න බලන්න.
ඔබටනේවාසික කුලී ගිවිසුම් ආකෘති පත්‍රය (පෝර්මය) තුළින්ද වැඩි විස්තර සොයා ගත හැකිය.
කුලී දේපළක් සඳහා අවම ප්‍රමිතීන්
අවම කුලී ප්‍රමිතීන්ට අනුකූලව දේප නඩත්තු කිරීමට ඔබේ කුලී සැපයුම්කරු වග බලා ගත යුතුය. පහත සදහන් දෑ ඇතුළත් වන බවට ඔවුන් වග බලා ගැනීම මෙයට ඇතුළත් වේ:
- කුලී දේපලෙහි පුස්, පළිබෝධ හෝ පණුවන් නැති බව
- උඳුන් සහ පෝරණු වැනි පවත්නා උපකරණ ක්‍රියා කරන බව
- ආරක්ෂිත, වැඩ කරන තාප ජනකයක් ඇති බව
- මුළුතැන්ගෙයට හා නාන කාමරයට ප්‍රමාණවත් උණු වතුර සැපයුමක් තිබෙන බව
- දේපලෙහි සැකිල්ල ආරක්ෂිත විම සහ කාලගුණ තත්ත්වයන්ට ඔරොත්තු දෙන බව.
කුලී දේපළ අවම ප්‍රමිතීන්ට අනුකූල නොවන්නේ නම්, ඔබ පදිංචියට යාමට පෙර කුලී ගිවිසුම අවසන් කළ හැකිය. ඔබ පදිංචියට ගිය පසු ඕනෑම වේලාවක කුලී දේපළ අවම ප්‍රමිතීන්ට අනුකූල වන පරිදි හදිසි අලුත්වැඩියාවක් ඉල්ලා සිටිය හැකිය.
සටහන: මෙය අදාළ වන්නේ 2021 මාර්තු 29 සිට අත්සන් කරන ලද නව කුලී ගිවිසුම් වලට පමණි. මෙම දිනට පෙර ඔබේ කුලී ගිවිසුම අත්සන් කර ඇත්නම්, අපගේ නව කුලී නීති පිටුවට මාරුවීම පිළිබඳ වැඩි විස්තර ඔබට සොයාගත හැකිය.
අවම ප්‍රමිතීන් පිළිබඳ වැඩි විස්තර සදහා, බලන්න කුලී දේපළ සඳහා වන අවම ප්‍රමිතීන්.
බැඳුම්කරයක් ගෙවීම
බොහෝ කුලී සැපයුම්කරුවන් ඔබ පදිංචියට යාමට පෙර බැඳුම්කරයක් ගෙවන ලෙස ඔබෙන් ඉල්ලා සිටිනු ඇත, එවිට ඔබෙන් දේපළ වලට සිදුවිය හැකි වන හානිය පියවා ගැනීමට මුදල් තිබේ.
ඔබ කිසිදු හානියක් සිදු නොකළේ නම්, ඔබ ඉවත්ව යන විට ඔබේ බැඳුම්කරය නැවත ලැබෙනු ඇත.
ඔබ අතින් යම් හානියක් සිදු වී නම්, ඔබ ඉවත්ව ගිය පසු හානිය නිවැරදි කිරීම සඳහා ගෙවීමට කුලී සැපයුම්කරුට බැඳුම්කරයෙන් කොටසක් හෝ සියල්ලම භාවිතා කළ හැකිය.
ඔබේ ගිවිසුම අවසන් වන තුරු බැඳුම්කර මුදල් ස්වාධීන සංවිධානයක් වන නේවාසික කුලී බැඳුම්කර අධිකාරිය (Residential Tenancies Bond Authority-RTBA) විසින් දරනු ලැබේ. ඔබ ඉවත් ව ගිය පසු (හානි පියවා ගැනීම සදහා) කුලී සැපයුම්කරුට මුදල් අවශ්ය නොවන්නේ නම්, බැඳුම්කර මුදලට ඔවුන්ට ප්‍රවේශ විය නොහැක.
ඔබේ කුලී සැපයුම්කරු බැඳුම්කරයක් ලබා ගන්නේ නම්, ඔවුන් කළ යුත්තේ:
- RTBA වෙත එය යොමු කිරීම
- අත්සන් කිරීම සඳහා සම්පූර්ණ බැඳුම්කර තැන්පත් කිරීමේ පෝරමයක් ඔබට ලබා දීම
- දේපළෙහි සාමාන්‍ය තත්ත්වය සටහන් කරන කොන්දේසි වාර්තාවක් සකස් කිරීම
ඔබේ බැඳුම්කරය ඉදිරිපත් කර ඇති බව පෙන්වන RTBA වෙතින් ඔබට රිසිට්පතක් ලැබෙනු ඇත. ඔබේ බැඳුම්කර රිසිට්පත ආරක්ෂිතව තබා ගැනීමට වග බලා ගන්න. ගෙවීමෙන් දින 15 ක් ඇතුළත ඔබට බැඳුම්කර කුවිතාන්සියක් නොලැබුණේ නම් RTBAඅමතන්න.
කොන්දේසි වාර්තාව
කොන්දේසි වාර්තාව ඔබ පදිංචියට යන දිනය වන විට දේපලෙහි සාමාන්‍ය තත්වය සටහන් කරන වාර්තාවකි.
කැඩී බිඳී ගිය හෝ හානි වූ කිසිවක් වැනි දේප සම්බන්ධයෙන් දැනට පවතින ගැටළු තිබේ නම් එය සඳහන් කළ යුතුය.
ඔබ ඉවත්ව යන විට, ඔබ දේපළ වලට හානි කර ඇත්දැයි පරීක්ෂා කිරීමට කොන්දේසි වාර්තාව භාවිතා කරයි (සාධාරණ වැහැරීම් හා ගෙවීයාම් ලෙස හැදින්වෙන, එදිනෙදා භාවිතයෙන් සිදුවන සාමාන්‍ය සුළු පිරිහීම හැරුණු විට).
ඔබේ කුලී සැපයුම්කරු හෝ නියෝජිතයා ඔබ පදිංචියට යාමට පෙර කොන්දේසි වාර්තාවේ අත්සන් කළ පිටපත් 2 ක් (හෝ එක් විද්‍යුත් පිටපතක්) ලබා දිය යුතුය. ඔබට කොන්දේසි වාර්තාව ලබා දුන් විට, ඔබ කළ යුත්තේ:
- දේපළ ආරක්ෂිතදැයි පරීක්ෂා කර ඔබගේ කුලී සැපයුම්කරුට හෝ නියෝජිතයාට කවර හෝ අවදානම් තත්වයක් (කැඩුණු තටාක වැටවල් හෝ විදුලි ගැටළ වැනි) ගැන කියන්න.
- වාර්තාවේ පිටපත් දෙකම පුරවන්න. ඉරිතැලීම්, බිත්තිවල සලකුණු හෝ කැඩුණු හැන්ඩ්ල්ස් (අල්ලු) වැනි දැනට පවතින හානි සටහන් කරන්න. ඔබේ කුලී සැපයුම්කරු හෝ නියෝජිතයා වාර්තාවේ ලියා ඇති දේ සමඟ ඔබ එකඟ නොවන්නේ නම් ඔබට එකඟ නොවීමේ සටහනක්තැබිය හැකිය.
- අයිතම, සවිකිරීම් සහ සවිකෘතවල තත්වය පෙන්වන ඡායාරූප ගන්න.
- කොන්දේසි වාර්තාවේ අත්සන් කළ එක් පිටපතක් ඔබේ කුලී සැපයුම්කරුට හෝ නියෝජිතයාට ලබා දී දින 3 ක් ඇතුළත ආපසු එවන්න.
- අනෙක් පිටපත කොතැනක හෝ ආරක්ෂිතව තබන්න. ඔබ ඉවත්ව යන විට ඔබට එය අවශ්ය විය හැකි අතර එවිට ඔබේ බැඳුම්කරය නැවත ලබා ගත හැකිය.
කුලී ගිවිසුම අතරතුර
කුලී දේපළෙහි ඔබ සිටින කාලය තුළ ඔබට යම් අයිතිවාසිකම් සහ වගකීම් ඇත.
- ඔබේ කුලිය නියමිත වේලාවට ගෙවන්න. සෑම කුලී ගෙවීමක් සඳහාම රිසිට්පතක් ලැබීමට ඔබට අයිතිය තිබේ.
- දේපළ ප්‍රමාණවත් ලෙස පිරිසිදුව තබා ගන්න. ඔබ එසේ නොකළේ නම් හෝ ඔබ දේපළ වලට හානි කරන්නේ නම්, ඔබ ඉවත්ව යන විට සම්පූර්ණ බැඳුම්කරය ආපසු ලබා ගත නොහැක.
- ඔබේ අසල්වැසියන්ගේ සාමයට සහ පෞද්ගලිකත්වයට ගරු කරන්න, ඔබේ අමුත්තන් ද එසේ කරන බවට වග බලා ගන්න.
- සිදු කළ යුතු ඕනෑම අලුත්වැඩියාවක් ගැන ඔබේ කුලී සැපයුම්කරුට හෝ නියෝජිතයාට කියන්න
- පින්තූර එල්ලීම සඳහා කොකු දැමීම වැනි කුඩා වෙනස්කම් ඔබට දේපළෙහි සිදු කළ හැකිය. නමුත් ඔබ කුලී සැපයුම්කරුගේ අවසරයකින් තොරව දේපළ අලුත්වැඩියා කිරීම, වෙනස් කිරීම හෝ නැවත සකස් කිරීම නොකළ යුතුය.
ඔබේ කුලී සැපයුම්කරුට හෝ නියෝජිතයාට දේපළට ඇතුළුවීමට අයිතියක් ඇත, නමුත් ඔවුන් ඔබට අවම වශයෙන් පැය 24 කට පෙර දැනුම් දීමක් ලිඛිතව ලබා දිය යුතු අතර ඔවුන් ඇතුළු විය යුත්තේ මන්දැයි ඔබට කිව යුතුය.
කුලී සැපයුම්කරුවෙකුට හෝ නියෝජිතයෙකුට දේපළට ඇතුළු විය හැකි වලංගු හේතු ලැයිස්තුවක්ඇත. එකඟ වූ දිනයක සහ වේලාවකදී ඔවුන්ට දේපළට ඇතුළු විය හැකිය. කුලී සැපයුම්කරුවන්ට හෝ නියෝජිතයින්ට දේපළ පරීක්ෂා කිරීම කළ හැක්කේ මාස 6 කට වරක් පමණක් වන අතර, ඔබ එහි ජීවත් වන පළමු මාස 3 තුළ පළමු පරීක්‍ෂණය කළ නොහැක.
වෙනස් කිරීම්
ඔබේ කුලී සැපයුම්කරුගේ කැමැත්ත පළමුවෙන් ලබා නොගෙන ඔබේ කුලී දේපළෙහි යම් යම් වෙනස්කම් කිරීමට ඔබට අයිතියක් ඇත. මෙයට ඇතුළත් වන්නේ:
- බිතු නැංවුම් සදහා පින්තූර කොකු හෝ ඉස්කුරුප්පු සවි කිරීම, නිරාවරණය වූ ගඩොල් හෝ කොන්ක්‍රීට් බිත්ති හැර වෙනත් මතුපිට බිත්ති මත රාක්ක හෝ බ්‍රැකට් සවි කිරීම.
- මුල් වතුර මල ආරක්ෂාකාරීව තබා ජල කාර්යක්ෂම වතුර මල් සවි කිරීම
- තිර (blind) හෝ රැහැන් නැංගුරම් (cord anchors) සවි කිරීම.
කුලී සැපයුම්කරුගේ ගිවිසුම අවශ්ය වන තවත් සැලකිය යුතු වෙනස් කිරීම් ද ඇත, කෙසේ වෙතත් ඔවුන් අසාධාරණ ලෙස ඔවුන්ගේ කැමැත්ත ලබා දීම ප්‍රතික්ෂේප නොකළ යුතුය. මෙම වෙනස් කිරීම් පිළිබඳ සම්පූර්ණ ලැයිස්තුවක් මෙතැනින් සොයාගත හැකිය.
ඔබ වෙනස් කිරීම් සිදු කර ඇති අතර ඒ සම්බන්ධයෙන් ඔබේ කුලී සැපයුම්කරු සමඟ වෙනත් ආකාරයකින් එකඟ නොවන්නේ නම්, ඔබේ කුලී ගිවිසුමට පෙර තිබූ තත්වයට පත්කොට දේපළ ආපසු ලබා දිය යුතුය.
කුලී සැපයුම්කරුවෙකුට කැමැත්ත ප්‍රතික්ෂේප කිරීමට අයිතියක් ඇති විට ඇතුළුව, වෙනස් කිරීම් පිළිබඳ වැඩි විස්තර සඳහා, කුලී නිවැසියන් දේපළකට වෙනස්කම් කිරීම බලන්න
අලුත්වැඩියා කිරීම
යම් දෙයක් කැඩී ගිය විට හෝ හානි වූ විට දේපළ අුත්වැඩියා කිරීමට ඔබට අයිතියක් ඇත. ඔබ හානියක් සිදු නොකළේ නම් (නිදසුනක් ලෙස, ඔබේ හීටරය කැඩී ගියහොත්) ඔබට ගෙවීමට සිදු නොවේ. ඔබ හානිය සිදු කළේ නම්, ඔබට අලුත්වැඩියාවන් සඳහා ගෙවීමට සිදුවනු ඇත.
ඔබ අලුත්වැඩියාවන් ඉල්ලා සිටි නිසා ඔබේ කුලී ගිවිසුම අවසන් කිරීමට ඔබේ කුලී සැපයුම්කරුට අවසර නැත.
අලුත්වැඩියාවන් හදිසි හෝ හදිසි නොවන ඒවා විය හැකිය. හදිසි අලුත්වැඩියාවන් යනු දේපළ තුළ ආරක්ෂිතව ජීවත්වීම සඳහා කළ යුතු ඒවාය. ගෑස් කාන්දුවීම්, කැඩුණු උණු වතුර පද්ධති හෝ හානියට පත් තටාක වැටවල් වැනි දේ මෙයට ඇතුළත් වේ.
වැඩි විස්තර සදහා, කුලී දේපළ අලුත්වැඩියාවන් බලන්න
ඔබට හදිසි අලුත්වැඩියාවක් අවශ්ය නම්
- ඔබේ කුලී සැපයුම්කරුට හෝ නියෝජිතයාට ලිඛිතව පවසන්න, ඔවුන් එය වහාම පිළිසකර කළ යුතුය. ඔබ මුලින් දුරකථනයෙන් ඔවුන් හෝ නියෝජිතයා සම්බන්ධ කර ගත්තද ඔබගේ ඉල්ලීම ලිඛිතව ඉදිරිපත් කිරීම හොඳ අදහසකි.
- අලුත්වැඩියාව ඉක්මනින් සිදු නොවන්නේ නම්, අලුත්වැඩියාවන් ඔබම කර ගැනීමට ඔබට ඩොලර් 2500 ක් දක්වා ගෙවිය හැකිය.
- ප්‍රතිසංස්කරණ කටයුතු සඳහා වු සියලු රිසිට්පත් සහ අලුත්වැඩියාවන් සඳහා වූ ඔබගේ ලිඛිත ඉල්ලීම්වල පිටපත් තබා ගැනීමට වග බලා ගන්න.
- මෙම පෝරමය භාවිතා කරමින් අලුත්වැඩියා කිරීමේ පිරිවැය ආපසු ගෙවීමට කුලී සැපයුම්කරුගෙන් හෝ නියෝජිතයාගෙන් ඉල්ලා සිටින්න. පෝරමය ලැබීමෙන් දින 7 ක් ඇතුළත ඔවුන් ඔබට ආපසු ගෙවිය යුතුය.
- හදිසි අලුත්වැඩියාවන් සඳහා ඔබට ගෙවීමට නොහැකි නම්, අලුත්වැඩියා කිරීමේ පිරිවැය ඩොලර් 2500 ට වඩා වැඩි නම් හෝ කුලී සැපයුම්කරු ගෙවීම ප්‍රතික්ෂේප කරන්නේ නම්, උපදෙස් සඳහා අපවඅමතන්න.
හදිසි අලුත්වැඩියාවක් අවශ්ය දැයි ඔබට විශ්වාස නැත්නම්, හදිසි අලුත්වැඩියාවන්ගේ සම්පූර්ණ ලැයිස්තුව කියවන්න
ඔබට දේපළෙහි ආරක්ෂිතව ජීවත් විය හැකි නම් අලුත්වැඩියා කිරීම හදිසි නොවේ. හදිසි නොවන අලුත්වැඩියාවන්ට කැඩුණු අල්මාරියක් හෝ පිඟන් කෝප්පයක් වැනි දෑ ඇතුළත් වේ. ඔබේ කුලී සැපයුම්කරු දින 14 ක් තුළ හදිසි නොවන දේ නිවැරදි කළ යුතුය.
ඔබට හදිසි නොවන අලුත්වැඩියාවක් අවශ්ය නම්:
- අලුත්වැඩියා කිරීම සඳහා ඔබේ කුලී සැපයුම්කරුගෙන් හෝ නියෝජිතයාගෙන් ලිඛිතව විමසන්න. ඔබට ඊමේල් පණිවුඩයක් හෝ ලිපියක් යැවිය හැකිය, නැත්නම් මෙම පෝරමය භාවිතා කරන්න.
- සියලුම ලිපි, ඊමේල්, කෙටි පණිවිඩ, පෝරම සහ වාර්තා වල පිටපතක් තබා ගන්න, එවිට ගැටලුවක් හෝ ආරවුලක් ඇති වූ විට, ඔබගේ සියලු ක්‍රියා සහ ඉල්ලීම් පිළිබඳ සාක්ෂි ඔබ සතුව ඇත.
- ඉල්ලීම ලැබී දින 14 ක් ඇතුළත කුලී සැපයුම්කරු හෝ නියෝජිතයා අලුත්වැඩියා කටයුතු කර නොමැති නම් අප අමතන්න නැත්නම් අලුත්වැඩියා කිරීම සඳහා VCAT ට අයදුම් කරන්න.
ගිවිසුමක් අලුත් කිරීම
ඔබගේ කුලී ගිවිසුම අවසන් වූ විට, ඔබට සැමවිටම ඉවත්ව යාමට අවශ්ය නැත. ඔබට දේපළෙහි රැඳී සිටීමට අවශ්ය නම්, ඔබට නව ගිවිසුමක් අත්සන් කිරීමට හෝ මාසයෙන් මාසයට ගිවිසුමක් ඇති කර ගත හැකිදැයි බැලීමට ඔබේ කුලී සැපයුම්කරු හෝ නියෝජිතයා අමතන්න. කුලී ගිවිසුමක් අලුත් කිරීම (බදු) ගැන වැඩිදුර කියවන්න.
ගිවිසුමක් අවසන් කිරීම
කුලී ගිවිසුමක් හේතු කිහිපයක් නිසා අවසන් විය හැකිය. පොදු හේතු කිහිපයක් වන්නේ:
- කුලී නිවැසියා ඉවත් වීමට තීරණය කිරීම
- ගිවිසුම අවසන් දිනට පැමිණ තිබීම
- කුලී සැපයුම්කරුට පදිංචියට පැමිණීමට, දේපළ විකිණීමට හෝ විශාල අලුත්වැඩියාවක් කිරීමට අවශ්ය ය.
කුලි නිවැසියන් කුලී ගෙවීම නවත්වා ඇත, අන් අය අනතුරට පත් කරමින් සිටී, දේපළවලට බරපතල හානි කර ඇත, හෝ ගිවිසුමේ නීති කඩ කර ඇත.
කුලී ගිවිසුම් අවසන් විය හැකි හේතු පිළිබඳ වැඩි විස්තර සඳහා, කුලී නිවැසියන් දැනුම් දීමක් කිරීම හෝ ප්‍රචණ්ඩත්වය, අන්තතරාදායක හැසිරීම සහ බරපතල හානි සඳහා වහාම පිටවීම සදහා කරන දැන්වීමක් බලන්න.
ඔබේ ගිවිසුම අවසන් කිරීමට ඔබට අවශ්ය නම්
ඔබට කුලියට ගත් දේපළකින් ඉවත් වීමට අවශ්ය වූ විට, ඔබ ඔබේ කුලී සැපයුම්කරුට නිවැරදි දැනුම් දීම් ගණනක් 1 ක් ලබා දී දේපළ පිරිසිදු තත්වයක තැබිය යුතුය.
- ඔබ කොපමණ කලකට පෙර දැනුම් දීමක් කළ යුතු දැයි දැන ගැනීමට අප සමඟ පරීක්ෂා කරන්න. ඔබගේ තත්වය අනුව මෙය වෙනස් වේ.
- ඔබ පිටත්ව යාමට අදහස් කරන විට විද්‍යුත් තැපෑලෙන් හෝ ලිපියක් මගින් ඔබේ කුලී සැපයුම්කරුට හෝ නියෝජිතයාට ලිඛිතව කියන්න.
- හිඟ කුලී සහ බිල් ගෙවන්න.
- ඔබේ බැඳුම්කරය ආපසු ලබා ගැනීම සඳහා ඔබේ කුලී සැපයුම්කරු හෝ නියෝජිතයා අමතන්න.
- දේපළ පිරිසිදු කරන්න, ඔබට අයත් සියලු දේ ඔබ සමඟ රැගෙන යන්න.
- බැඳුම්කරය නැවත ලබා ගැනීමේදී ගැටුලු ඇති විය හැකි බැවින කොන්දේසි වාර්තාව තබා ගන්න.
- ඔබේ කුලී සැපයුම්කරු හෝ නියෝජිතයා සමඟ සම්බන්ධතා ලිපිනයක් සහ දුරකථන අංකයක් තබන්න.
බැඳුම්කරය නැවත ලබා ගැනීම
කුලී සපයන්නන් විසින් අවසාන පරීක්ෂණයක් පවත්වා දේපළෙහි යම් වෙනසක් සැසඳීම සඳහා කොන්දේසි වාර්තාව භාවිතා කරනු ඇත. බැඳුම්කරයෙන් කොටසක් ඉල්ලා සිටීමට ඔවුන්ට හොඳ හේතුවක් ඇතැයි ඔවුන් සිතන්නේ නම් ඔවුන් ඔබට කියනු ඇත.
කුලී සැපයුම්කරු බැඳුම්කරයෙන් කීයක් ලබා ගන්නේද යන්න පිළිබඳව ඔබ එකඟ නොවන්නේ නම් බැඳුම්කර හිමිකම් පෝරමයට අත්සන් නොකරන්න. නොමිලේ උපදෙස් සඳහා අපව අමතන්න.
කිසි විටෙකත් හිස් බැඳුම්කර හිමිකම් පෝරමයකට අත්සන් නොකරන්න.
නියමිත කාලයට කලින් ගිවිසුමක් අවසන් කිරීම (බදුකරයක් කඩ කිරීම)
එහි බදුකරය අවසන් වන දිනයට පෙර කුලී දේපළකින් ඉවත් වීමට ඔබට අවශ්ය නම්, ඔබට පිරිවැය ගෙවීමට සිදුවනු ඇත, එවිට කුලී සැපයුම්කරුට මුදල් අහිමි නොවේ.
කුලී සැපයුම්කරුට කෙලින්ම පදිංචිය සදහා කෙනෙකු සොයාගත නොහැකි නම්, ඔබ ඉවත්ව ගිය පසු කුලී ගෙවීම දිගටම කරගෙන යාමට සිදු විය හැකිය.
කෙසේ වෙතත්, ඔබ ගෙවිය යුතු පිරිවැය සාධාරණ විය යුතු අතර, කුලී සැපයුම්කරුද නව කුලී නිවැසියන් සොයා ගැනීමට හැකි සෑම දෙයක්ම කළ යුතුය. සාධාරණ වියදම් යනු බොහෝ අය සාධාරණ යැයි සිතන පිරිවැයයි. සාධාරණ පිරිවැය යනු කුමක්ද යන්න නීතියෙන් නිශ්චිතව නිර්වචනය නොකෙරේ, එබැවින් මිනිසුන්ට සාධාරණ දේට එකඟ විය නොහැකි නම්, තීරණයක් ගැනීමට VCAT වෙත අයදුම් කළ හැකිය.
නියමිත කාලයට කලින් ගිවිසුමක් අවසන් කිරීම පිළිබද වැඩිපුර කියවන්න.
කුලී ගිවිසුමක් මාරු කිරීම
කුලී ගිවිසුමක් කල් තියා අවසන් කිරීම සහ පිරිවැය ගෙවීම වෙනුවට, ඔබට ගිවිසුමක් අන් අයට පැවරීමට හැකිය.
ඔබ ගිවිසුම් මාරු කිරීමක් කරන්නේ නම්, ඔබට තවමත් හුවමාරු ගාස්තු ගෙවීමට සිදුවනු ඇත, කෙසේ වෙතත් එම ගාස්තුව, ඊට අදාළ වැඩ ප්‍රමාණය සඳහා වූ සාධාරණ ගාස්තුවක් විය යුතුය. කුලී ගිවිසුමක් මාරු කිරීම ගැන වැඩිදුර කියවන්න.
නිවෙස හැරයන ලෙස ඉල්ලා සිටීම (ඉවත්වීමට දැන්වීමක් ලැබීම)
කුලී සපයන්නන්ට දේපළ හැර යන ලෙස ඔබෙන් ඉල්ලා සිටිය හැකි නමුත් එසේ කළ හැක්කේ යම් හොඳ හේතුවක් මත පමණි. උදාහරණයක් වශයෙන්:
- කුලී ගිවිසුමක් අවසන් වීම
- දේපළ මිනිසුන්ට ජීවත් වීමට නුසුදුසු තත්වයට පත් වීම
- ඔබ අවම වශයෙන් දින 14 ක කුලියක් නොගෙවා තිබීම.
කුලී සැපයුම්කරුවෙකුට, නීත්‍යානුකූලව හිමිකම් ඇති යමක් කිරීම නිසාවෙන් හෝ එවැනි යමක් කරනු ඇතැයි කියමින් කුලී නිවැසියෙකුට ඉවත්ව යන ලෙස දැනුම් දිය නොහැක.
නිදසුනක් ලෙස, කුලී සැපයුම්කරුවකුට පහත සදහන් කාරණා සම්බන්ධයෙන් ඉවත්ව යන ලෙස නිවේදනයක් ලබා දිය නොහැක:
- අලුත්වැඩියා කිරීමක් ඉල්ලීම
- සුරතල් සතෙකු ඇති කිරීමට අවසර ඉල්ලීම
- කුලිය වැඩි කිරීමක් සම්බන්ධයෙන් එකග නොවීම
කෙසේ වෙතත්, කුලී සැපයුම්කරු කුලී ගිවිසුම අවසන් කිරීමට කැමති වීමට වෙනත් හේතු තිබේ. කුලී සැපයුම්කරුවකුට ඔබෙන් ඉවත් වන ලෙස ඉල්ලා සිටිය හැකි අතර, ඔවුන් ඔබට කොපමණ කලින් දැනුම් දීමක් කළ යුතුද යන්න දැන ගැනීම සදහා බලන්න කුලී දේපළවලින් ඉවත්වීමට දැන්වීමක්.
නිවෙස හැරයන ලෙස කෙරෙන නිවේදනයකට එකග නොවීම
ඔබට නිවෙස හැරයන ලෙස නිවැරදිව දැනුම් දීමක් ලබා දී නොමැති බව ඔබ සිතන්නේ නම් හෝ ඔබේ කුලී සැපයුම්කරු ලබා දී ඇති හේතුව අසත්‍ය හෝ අසාධාරණ යැයි ඔබ සිතන්නේ නම්, ඔබට එම දැන්වීමට අභියෝග කළ හැකිය. වැඩි විස්තර සඳහා අප අමතන්න.
නෙරපා හැරීම් (සන්තක නියෝගයක් ලැබීම)
ඔබව නෙරපා හරිනු ලැබූවේ නම්, සහ උපකාර අවශ්ය නම්, නොමිලේ උපදෙස් සඳහා අපව අමතන්න.
මතක තබා ගත යුතු වැදගත් දේවල්
- එහි තේරුම ඔබට වැටහෙන්නේ නම් මිස කිසිවක් අත්සන් නොකරන්න.
- එය නිල වශයෙන් පෙනුනත්, කිසි විටෙකත් හිස් බැඳුම්කර හිමිකම් පෝරමයකට අත්සන් නොකරන්න.
- ඔබ අත්සන් කරන ඕනෑම දෙයක පිටපතක් තබා ගන්න.
- ඔබේ කුලී සැපයුම්කරු හෝ නියෝජිතයා සමඟ කරන සියලුම සන්නිවේදනවල පිටපත් තබා ගන්න.
- ඔබට යමක් ගෙවීමට සිදුවන සෑම අවස්ථාවකම කුවිතාන්සියක් ඉල්ලන්න.
- ඔබේ බැඳුම්කර කුවිතාන්සි සහ කුලිය සම්බන්ධ වෙනත් කුවිතාන්සි හෝ අලුත්වැඩියා කිරීම සම්බන්ධ කුවිතාන්සි ආරක්ෂිත ස්ථානයක තබා ගන්න.
ඔබට කුලියට ගැනීම සම්බන්ධ ගැටලුවක් හෝ ප්‍රශ්නයක් ඇත්නම්, නොමිලේ උපදෙස් සඳහා අපව අමතන්න.
පරිවර්තකයෙකුගේ සහාය ඇතිව පාරිභෝගික කටයුතු වික්ටෝරියා සමඟ කතා කිරීමට 13 14 50 අමතන්න